Uva Madura

Cuando a un, que tovía anda a marivueltes colo de los cuarenta años, y comuniquen, de sópitu, que va ser galardonáu con un reconocimientu que lleva por nome Uva Madura, de mano puede da-y por esmolecese. Lluéu, cuando ya te despliquen meyor en que consiste el galardón, y que ye un reconocimientu pola to trayectoria profesional, na defensa de los vinos de Cangas nos caberos años esi esmolecimientu cambia de sintíu… Agradécese enforma el galardón, recuéyeslu col arguyu del que ta satisfechu cola so llabor, pero a un tiempu nun ti queda otra que llamentar que dalgo seguimos faciendo mal nesta Asturies nuestra.

Nun ye la primer vegada que mi pasa esto… Quiciavis tampocu seya la última.

Cuando nel añu 2006 la Hermandá La Probe de Morcín y l`Asociación de Queseros Artesanos d`Asturies mi dieren el reconomientu como Queseru Mayor d`Asturies dempués d`espublizar cola Editorial Picu Urriellu Cuarenta Quesos, Cuarenta Platos tamién por pescaciar qu`esa yera una de les grandes contribuciones de la dómina a la promoción de los nuestros quesos del país, nun pudi evitar al pronunciar unes pallabres recoyida de la escultura d`un artesana quesera fecha en ceramica prieto, argumentar que pa min aquello más que un reconocimientu, yera la robla d`un compromisu co`l sector, porque facer el mio trabayu como cocineru asturianu y escribir llibros sobre nuestros quesos asturianos, nun país normal, nun tendría que ser motivu de reconocimientu dalgún. Simplemente tendría que ser dalgo normal.

Agora, dempués de recoyer el diploma y espetu conmemoratívu que m`acredita como Uva Madura pola mio llabor d`afalamientu, defensa y valorización del vino D.O.P. Cangas, na pasada Fiesta de la Vendimia, los sentimientos vuelven a ser contradictorios. A naide y amarga un reconocimientu, menos entá cuando bien de la mano d`una de les poques marques de calidá asturianes que está reescribiendo con mano firme y bona lletra la so hestoria; La hestoria d`unos vinos que nel sieglu XIX gozaben d`enorme reconocimientu allende les nueses fronteres y qu`anguañu tan resurdiendo, pente les povises del propiu sector mineru suroccidental qu`un día dió la espalda a la viña y arrequexó la producción del vino a dalgo domésticu, amenorgáu. Casique anecdóticu.

Nun me siento merecedor d`esti prestosu reconocimientu. Porque namas toi faciendo lo que el sentíu común m`obliga a facer como cocineru y comunicador gastronómicu asturianu. Nun me presta ser la esceición que confirma la regla de qu`al hosteleru asturianu y la traiga al pairo si n`Asturies se tan faciendo vinos del país o non, con variedaes autóctones propies o non, cultivaes n`Asturies o non, acoyíes a una Denominación d`Orixen Protexía o non.

Pero ciertu ye que, tamién por sentíu común, préstame bien d`ello que la xente de la D.O.P. Vino de Cangas me reconociera como Uva Madura. Porque pa min ye un indicador de que como profesional y apasionáu del nuestru productu y la nuestra tierra toi caleyando pol camín que quiero caleyar.