N`ocasiones, la mio ocupación llaboral «oblígame» a dir a según que actos inagurales, presentaciones, aconceyamientos o cellebraciones varies… Otres munches, por custiones d`axenda, nun me queda más remediu que quedame coles ganes de tar en sigún qu`eventos; Tovía esti martes tuvi qu`ausentame de la presentación del llibru de Ivan de la Plata «Sidra, Esencia de Asturias», cosa que me fadió enforma.

Sicasí, esti pasáu miercoles, si que me tocó averame fasta la cellebración de los 10 años de la Indicación Xeográfica Protexía «Ternera Asturiana» («Xata Asturiana»). L`auditoriu de La Pola Siero foi l`escenariu escoyíu p`acoyer esti prestosu cumpleaños, del que, taba comenciu, l`equipu capitaneáu por Vicente de Diego diba salir más qu`airosu… Y nun m`equivoque pa nada.

Llevo a gala el pregonar que la I.X.P. «Ternera Asturiana» ye exemplu de como tien de xestionase una marca de calidá. Y eso demostrose tamién a la hora de cellebrar esti alcuentru d`aniversariu. Tolos que tabemos ellí creo que fuimos quien a sintir l`ésitu de la marca como propiu; fueramos operadores, ganaeros (los que más), prescriptores, veceros o representantes istitucionales. Gala de cabudañu cenciella pero prósima, austera pero de calidá, llarga pero no pesada, y sobre tou agradable…mui agradable.

Nos diez años d`esistencia de «Ternera Asturiana» (Xata Asturiana) el Conseyu Regulaor nun solu vien algamando cifres cada vuelta más positives no que se refier a cria, engorde y venta de les sos cabeces de ganáu, sinon que vien afitando cada vegada con más fuerza la marca, convirtiendola en referencial y faciendo que`l ciudadanu d`a pie la reconoza y s`identifique con ella. Sin marafundiar presupuestos, añu tras añu invierte intelixentemente en campañes de marketing nun menos intelixentes. «El placer de la Carne», «Orgullosos de lo nuestro», o la mas de recien «No soy como las demás» son llemes desendolcaos por estremaes empreses de publicidá que contribuyeron a espardir y afitar el llogotipu verdiblancu que siluetea una vaca y una xatina del país.

Deportistes como la montañera Rosa Fernández, o los piragüistes Manolo Busto o Milín Llamedo tamién taben presentes nel eventu. Ensin escaecer a los representantes institucionales, técnicos de la Conseyería, direutores «rexonales», o conseyeros que contribuyeron demientres esta década al ésitu d`esti proyectu.

Valeriano Remis, presidente de la I.X.P. foi l`encargáu d`abrir la gala, presentada pol periodista Pachi Poncela, con unes emocionaes y sentíes pallabres. Reconocimientos a veinte ganaderíes acoyies a la marca, notes d`humor a cargu del monologuista avilesín Carlos Alba (Cellero), intervenciones istitucionales, acercamientu a la realidá del proyectu, de la mano del xerente del Conseyu Regulaor Vicente De Diego, y la gran voz de Anabel Santiago fueron los momentos más destacaos de la velada, na que tamien se cunto cola presencia del escritor, actor, director y guionista Maxi Rodríguez y del dibuxante Mortimer, autores entrambos de «No soy como las demás», una curtia novela, historieta prefieren denomala los autores, na que «Estrella» una xata con «carné» mos desplica, a la so manera, la hestoria de la Indicación Xeografica Protexía. Novela que fadría a les veces de regalu protocolariu pa tolos presentes.

Comu remate del actu, un pequeñu «ágape», o «pincheu asturianu» (el presentaor emperrose en denomalu «vino español» pero por fortuna lo que elli se prebo yera lo que tenía que ser…xata asturiana, viandes d`esta tierra, sidra de mesa, y como non…vinu asturianu…Vinu de Calidá de Cangas. El  nuestru vinu pa cola nuestra carne.

A la fin…Que «Pelayina», la mascota de la I.X.P taba de «cumple», y con ella tolos ganaeros, mataeros, sales de despiece, carniceros, cocineros, hosteleros y veceros que trabayamos cola marca…Llarga vida a esti proyeutu cabal que como cualisquier proyeutu sufrió los sos vaivenes a lo llargu d`esti tiempu, pero qu`antoxasenos de futuru y referencial pa otres munches marques de calidá asturianes presentes y futures.