La mayor tosta de quesos artesanos del mundu

El domingu 11 de setiembre celebrábase en La Foz de Morcín la XXIII Feria de los Quesos Artesanos Asturianos,la «decana» nesto d`aconceyar a productores queseros de toos y caún de los nuestros quesos artesanales asturianos. Foi hai agora ventritrés años cuando la Hermandá de La Probe se decidió a entamar esta primer feria, siempre a comuña cola Asociación de Queseros Asturianos. Al abellugu d`esti certame nacieron gallardones talos como`l de Queseru Mayor d`Asturies, qu`un sirvidor tuvo l`arguyu de recibir nel añu 2006 y que nesti añu foi a parar a la Caja Rural pol so sofitu cola financiación de dellos llibros sobre quesos asturianos.

Poca xente asistió nuna prestosa mañana de setiembre a esti certame queseru. Poca xente y, lo que ye peor, pocos artesanos queseros. Y tengo que ser sinceru y dicir que m`esmolez enforma qu`esti tipu d`eventos básicos pa la promoción de los productos artesanales asturianos pierdan puxu. Sicasí, a la tarde, la propuesta, a comuña xunto al incansable Pepe Sariego -alma d`esti certame y de tantísimes otres coses que se faen en La Foz de Morcín-, de facer la mayor tosta de quesos artesanales del mundu foi tou un éxitu.

Cincuenta metros de pan d`escanda, xentileza de Fernando Farpón y Speltastur, la so firma comercializadora de fariña y productos derivaos de la escanda asturiano, cinco quilos de tomate fresco triturao con ayu y aceite d`oliva, cerca de trenta quilos de quesos artesanales asturianos de toa triba (de vaca, de cabra, d`oveya, Afuega`l Pitu, Cabrales, Gamonéu, de Vidiago, de Los Beyos, Casín…) y oriéganu foron los ingredientes empleaos pa facer la tostona quesera.

Como gratinador, un «argadiellu Made in la Probe» fechu con resistencies llétriques de cuatro mil vatios de potencia foi turriando la rebanada de pan con quesu nun intervalu de cuatro minutos el metru. Foron quien a prebar la esquisita tosta quesera más de setecientes cincuenta persones.

Los medios de comunicación cubrieron enforma l`eventu. Inclusive la TPA fixo tres conexones en directo cola fechu de la tosta, anque daquién tendría qu`esplica-y al «reporterín» que se desplazó hasta ellí que nun existe`l pan «d`escana», y que pand «d`escanda», un cereal ancestral asturiano col que se fai un pan de mui alta calidá… Pero, en fin, la documentación periodística ye algo que polo visto yá nun s`estila ente los profesionales de los medios de güei…Asina tamos como tamos.

Prestosa foi la esperiencia de la fechura de la Mayor Tosta de Quesos Artesanos del Mundu. El méritu, pa tolos qu`andechemos esi día y dies anteriores na so preparación. Los fabricantes del «argadiellu», los panaderos de Speltastur, los cocineros de Tierra Astur, los Cofrades de la Probe y los Nabos de La Foz, los artesanos queseros y, como non, el mayor méritu pal amigu Pepe Sariego, al que de xuru ayudaremos añu tres añu pa qu`esta Feria de los Quesos Artesanales Asturianos de La Foz siga teniendo`l puxu y relevancia que siempre tuvo.

Publicado en Lengua Asturiana en el Semanario «Les Noticies» del 18 de Setiembre de 2011