Con Antonio na Mayada de H.umartini (Llagos de Cuadonga)

Por circunstancies, que`l tiempu mos dirá. Llevo visitando nos meses caberos a estremaos pastores y queseros artesanos de la comarca oriental asturiana. Como asturianu, profesional del ámbetu de la gastronomía y persona comprometía col producto agroallimentariu del país y cola tierra que posibilita la so esistencia, llevo tiempu enforma esmolecíu  pola situación del pastoréu nes nuestres montañes.

Considérome ecoloxísta, dende siempres, dende neñu. Porque ser ecoloxista, recurriendo a los xuegos de pallabres, y al mio cenciellu entender, nun ye otro que defender los ecosistemes nos que vivimos d`un forma «lóxica». Crieme pente cazadores y pescadores y por eso también atalanto que`l cinexéticu tien que ser un recursu indipensable pa caltener el equilibriu del nuesu ecosistema, además de fonte de recursos pa`l mediu rural asturianu.

Préstenme lo animales. Tolos animales, y defendo la pervivencia de les races y les especies. A ser posible de toles races, de toles especies. Nun soi especialista en ñatura, nin en bioloxía, munchu menos en zooloxía. Sicasí puede que d`antropoloxía sepia un puquiñin más, por formar yo mesmu parte d`esta especie y porque me presta enforma saber del pasáu de la mesma nel ámbetu rural.

Por eso quiero dende`l mio blog personal, ensin recurrir a extremismos nin pretender el desaniciu de ninguna otra especie xabaz, posicioname dafechu a favor del caltenimientu de la «raza» de los pastores de los Picos d`Europa. Ye absurdu pretender la defensa de los nuestros quesos artesanales o la recuperación de races autóctones doméstiques, como la cabra bermella, el asturcón, la oveya xalda o la asturiana de la montaña ensin garantizar antes la esistencia de los pastores. Por eso l`alministración, los axentes implicaos y el ecoloximu consecuente tien que tomar midies pa calibrar la balanza trófica de forma que la montaña asturiana nun solu se caltenga, sinon que se tresforme en fonte de futuru y de recursos, siempre dende una perspeutiva sostenible p`Asturies y la so xente.

Porque «Ensín pastores nun hai paraisu» nin habrá Asturies. Polo menos esa Asturies pola que munchos nagüamos.