Cuando unu fae una collaboración periodística al mes nun mediu xeneralista, anque seya coles especifidaes qu`acarreta el tratase d`un selmanariu espublizáu en llingua asturiana; Al llegar el momentu d`esgarabatiar la collaboración del mes d`avientu, y más tratándose d`un escritu de calter gastronómicu faese cuasi imposible el dexar de tratar la temática arreyada a les “fartures navidiegues”.

Paez inevitable tener que falar de pitos de caleya, corderos xaldos, sidres xampanizaes…Turrones de sidra y mazana, dulcería tradicional, tables de quesos artesanales…Vinos de la Tierra de Cangas, Auguardientes de Sidra, Conserves asturianes d`alta calidá, Mariscos del Cantábricu o pescaos de la nuesa rula más prósima. Pues non, esta vegada nun lo voi a facer. Llevo selmanes pregonando en televisión y radio les bondaes de los nuesos productos por comencimientu propiu y por obligación llaboral y nun pienso emplegar les quinientes pallabres que mensualmente me cede esti mediu escritu pa siguir faciendo apoloxía de la nuesa bayurosa gastronomía.

Voi poneme al altor de los nuesos políticos y emplegar esti espaciu pa falar de too ensin falar de nada. Voi, como faen ellos, a dicir que voi facer de too y nun mover una paya. Voi perder la oportunidá de contribuyir a reforzar la ilusión d`aquellos que me lleen creandoyos falses espectatives y traicionando una vuelta más la so confianza.

Tengo cada vegada más la sensación de que namai somos marionetes y de que ya nin tan siquier mos importa quien mueve los nuesos filos. Equi n`Asturies salimos de Guatemala y como la cosa nun de un xiru de 360º tornaremos a Guatemala y nun saldremos d`ella enxamás de los xamases. Nel Estaú Español tenemos un nuevu presidente embaxu de la cama mientres la Casa Real roba a manos enllenes y nadie nun diz nada. A un tiempu Merkel y Sarkozy paez que son los que marquen el ritmu nel diapasón de la marcha fúnebre del nuesu Estáu del Bientar. Aunque ye ciertu…sabémoslo… Ellos tamién son marionetes. Con too y con eso, la xente ta encantáu porque fae sol n`avientu, casique nun hai friu poles mañanes y vivimos nun nuevu mundu aestacional, sin tan siquier decatase de qu`esti ye`l problema más abegosu que tenemos enriba y que d`equí, desti cambiu climaticu ensin xacíu derivará l`auténtica cris, la cris que nun tien igua. Agora xintamos oricios en Payares y Bonitu en Marzu y facemoslo encantaos… Ensin da-y importancia a lo que pue suponer a llargu plazu esti desbarrie climáticu.

Podía aprofitar tamién estes llinies pa felicitar les fiestes a toes/oos les/os que me lleeis mensualmente… Pero tampocu lo voi a facer porque agora mesmu paezme absurdu deseyar a nadie un “prosperu añu 2012”…Prosperu, profitosu venturosu… Si lo ficiera tornaríame en agoreru porque en vista lo vistu faeseme de mal gustu deseyar imposibles. Lo más que m`atrivo ye a deseyavos un “paciente 2012” porque paciencia ye lo que necesitamos viendo lo que tenemos al nuesu alrodiu.

Con too y con ello. Un abrazu melgueru pa tola bona xente que tais ehí, perdiendo el tiempu lleendo quinientes pallabres de desaliendu.