Llagar, semeya de Jose María Osoro

Porque a la fin igual mos dá que seya una Ordenanza Municipal de Convivencia Ciudadana d`un conceyu como`l de Xixón, gobernáu  por un partíu de calter rexonal de ranciu abolengo, qu`una Llei autonómica  d`Atención Integral en Materia de Drogues promovía pol supuestu progresismu de la socialdemocracia española. La cultura de lo propio, la cultura asturiana, y nesti casu la cultura de la sidra, siempre salen escaldaes.

Asturies, tien la particularidá de cuntar con un fechu diferencial, unu más, que pa sigo quisieren cualquiera de les 16 comunidaes autónomes restantes del Estáu Español. Asturies tien una bebida propia, ñatural y de baxa graduación alcohólica enxertada nel so códigu xenéticu y eso nun hai Ordenanza nin Llei que pueda obvialo.

Defender, a costafecha, esta diferencialidá, nun ye tar a la escontra de la convicencia ciudadana, nin afalar l`alcoholismu. Criticar lo que ta mal fecho o lleva camín d`ello con nomes y apellidos ye dar un esmenón a técnicos y políticos que nun faen bien los deberes, que trabayen y lexislen en base a borraores xenéricos de lleis en furrulamientu notros territorios y que nun tienen a bien considerar la cultura asturiana, tampocu la de la sidra, como un factor a respetar. Cenciellamente porque nesta tierra nuestro a la cultura propia dende les instituciones enxamás se la respetó gran cosa.

Lo de nun poder echar sidra a la puerte d`un chigre en Xixón por tar consideráu “botellón” nun tien nome.  Lo de que los menores d`edá pa entrar nun llagar tengan que facelo acompangaos d`un adultu pa que te voi a cuntar. Agora lo que más m`esmuel ye eso de prohibir les “barres llibres” asina, ensin definir gran cosa. ¿La sidra a manplén escanciada nuna espicha en cualisquier llagar o sidrería tará tamién considerada como “barra llibre” pa los nuesos lexislaores?