Presentación Xornaes Gastronómiques del Xaldu en Tierra Astur

Y van siete. Siete ediciones que me toca coordinar  les Xornaes Gastronómiques del Corderu Xaldu de les Sidreries Tierra Astur. Y cerca de diez años dende que descubriera por primer vegada, a los 29 años y de la mano del mió amigu Antón Álvarez Sevilla, les bondaes d`esta, la raza ovina de los asturianos.

Entá m`alcuerdo perbien d`aquella primera vegada. Taba yó cocinando en Les Arriondes, nel restaurán del clásicu Café Español, qu`enta güei sigue siendo un de los llugares del referencia na capital parraguesa y un de los pocos llocales que sigue sirviendo les típiques «compuestes»; Vermús «adobaos» con una formula más secreta que la de la cocacola yanqui y con propiedaes que pa sí quisiera l`elisir americanu.

La «escusa» pa descubrir esti xéneru, d`aquella perescasu, nun foi otra qu`una cena navidiega pente collacios. El descubrimientu dexomos a toos, comensales y cocineru, ensin pallabres. Y dende entós fasta güei.

Cuando aporté a Tierra Astur atopeme con que nesta casa, que güei ye la mía, ya trabayaben cola raza, tamién por indicaciones d`Álvarez Sevilla. En 2004 cellebramos la primera edición d`estes xornaes gastronómiques. Añu tres d`añu  hai que dicir que la Xalda nun fexo más que damos alegríes.

Güei na presentación de la séptima edición d`estes xornaes el presidente de l`Asociación de Criaores d`Oveya Xalda Asturiana (ACOXA) cifró en más de 4000 el númberu de madres reproductores d`Oveya Xalda y en cerca de 200 los machos reproductores. Perbones cifres pa una raza que tuvo cerquísima del desaniciu  cuando nel añu 1992 ACOXA entamó la so actividá con un censu de nun más de 30 madres reproductores.

Cada vegada más criadores. Cada vegada rebaños más grandes. Y lo que ye tantu o más importante. Cada vegada más cocineros y restaurantes qu`apuesten po`l Corderu Xaldu Asturianu como protagonista de les sos cartes de temporada faenmos camentar qu´hai auténticos «biltos verdes» nel mediu rural asturianu. Nun por pequeños menos importantes pa`l futuru d`Asturies y la so economía llocal.