El pasáu sábadu, 9 d`Ochobre presentábamos el proyeutu “Escanciador 2.0” dientru del programa del Foru Internet Meeting Point #FIMP, probatiblemente’l meyor alcuentru d’Internet del norte del Estáu Español, que se cellebra añalmente en Xixón organizáu por El Comercio.es y del que ye cabezaleru visible Carlos Urioste, un auténticu celebru nesto de los nuevos medios comunicativos, amás de figura tranquila y pausada tres la qu`aldovinase que s`escuende una persona y profesional d`espatarrar.

Quiciavis hai unos años, perpocos, naide nun atalantara lo que`l biltar de les nueves Redes Sociales diba a llegar a suponer pa la nuesa sociedá. Quiciavis si d`aquella dalguien s`atriviera a dicir qu’al traviés de redes como Twitter o Facebook, una empresa como Tierra Astur/Crivencar diba a poder aportar a millares de veceros y siguiores con un coste “0” y con un retornu descomanáu, naide nun diera credibilidá a eses pallabres.

Por embargu lo que dalgunos definieron como “futuru” ye ya un “presente”. Y el nuesu curtiu “Monologueando”, enxertáu dientro d`un programa enllenu d`espertos en Social Media foi nidiu exemplu d`ello.

Hai unos meses presentábemos públicamente’l nuesu Plan formativu pa escanciadores, asina como la figura del nuesu “Mayestru Escanciador”, un auténticu “sumiller de la sidra”, encarnáu na persona de Sabino Perez Presa. El sábadu decidimos dar un pasu más. Virtualmente ñacía @escanciador, el nuesu Escanciador 2.0, un escanciador qu`al traviés de la, al mio pescanciar, más dinámica de les redes sociales, Twitter, va echar un gabitu a toes/oos aquelles/os que quieran tener más conocimientu sobre`l mundu de la sidra y tolo qu`arrodia a esta.

El decálogu del escanciador, algunes notes sobro la preba de sidra, apuntes de vocabulariu sidreru, apuntes sobre les bones práctiques nel consumu de la sidra…De too esto y de munchu más va falar el nuesu @escanciador con tolos sos seguidores… Y nun solu eso…tamién queremos que pente @escanciador y los sos seguidores s`estableza un vínculu de collaboración, espardiendo a través de “retuis” onde tan al bon entender de los sidreros asturianos los meyores “culetes”, o d`onde se cellebren los meyores eventos sidreros.

Facer les coses bien nel 1.0 pa llueu reproduciles nel 2.0, esi ye l`oxetivu que dende la nuesa empresa perseguimos con esti tipu d`iniciatives. De nada serviría entamar campañes de marquetín en RRSS, tener milenta de seguidores en Facebook o Twitter, colgar los más prestosos vidios en Youtube o facer un cientu de promociones en Foursquare si llueu’l veceru qu`entra nos nuesos llocales ta mal atendíu, come mal o echamos-y mal la sidra.

Lo que si ye bien ciertu ye qu’aprofitar les oportunidaes que mos plantegan les redes sociales como mediu pa esparder les nueses aiciones personales, profesionales o de marquetín ye anguañu básicu y ellemental. Con ello nun quiero dicir que seya cierta la másima de “lo que nun ta nes redes sociales nun esiste”, pero si la de que “lo qu`esiste tien que tar tamién nes redes sociales”.