INTERVENCIÓN PÚBLICA EN LENGUA ASTURIANA PRONUNCIADA EN LA PRESENTACIÓN DE LAS VII JORNADAS GASTRONÓMICAS DE VALDESOTO
Bones tardes…o bones nueches meyor a tolos presentes…
En primer llugar agradecer a la Peña Gastronómica “La Xinta” de Valdesoto que s`alcordara de la mio persona p`abrir esta VII Edición de les Xornaes Gastronómiques de Valdesoto.
Cuando hai cerca ya d`un añu que me propunxeran, al travies d`un amigu común, el abrir estes xornaes, tengo que reconocer que me prestó enforma la propuesta. Non porque seya yo una persona dafechu arreyada al pueblu de Valdesoto, non. Ye más, hai bien pocu que pise por primera vegada estes tierres, por embargu sintía yo p`al mio adientru que`esti pueblín tenia un valir perespecia. Siempres oyera de lo bien que se xintara en Valdesoto, Ablucara coles sos carroces y comedies ya fuera nel Día d`America n`Asturies o nel Certame d`Agrosiero de La Pola y conocía d`oyíes too aquello de les mazcaraes y los sidros.
Quixo la casualidá qu`esti añu conociera precisamente a Ivonne y a Juan, de Casa Telva cuando por mediación de Viri, la de Llar de Candamu, acudieran a un aconceyamientu de Slowfood Asturies, un movimiento internacional que predica la comida y l`allimentu buenu, llimpiu y xustu, además de cercanu. Tamién conocí a Pablo, perenfotáu en que la empresa na que trabayo collabore coles sos mazcaraes ya seya en Valdesoto, Lisboa, Zamóra o au se tercie…que tou s`andará Pablín. Y tamien dase el casu que bauticeme hai bien poco nel ritu de saborguiar esa excelencia casique prohibía…aunque disfrutar coses prohibies ya nun ye novedá nestos tiempos que cuerren, que ye`l burrín. Eso si, tengo que reconocer que lu comí en Cualloto y non en Valdesoto.
Vais permitime qu`entame falando de Xornaes Gastronómiques, que a eso venimos…Hai una fargatada d`años, yera yo un neñu entá, entamaron a cellebrase per Asturies toa triba de alcuentros gastronómicos col finxu, les más de les vegaes, d`incentivar el sector hosteleru en dellos conceyos y villes del país. Yo alcuerdome con especial cariñu de lo que significaren, alla polos ochenta les prestixoses y prestixaes Xornaes Gastronómiques de la Mar de Ribeseya. Probatiblemente de los primeros certamenes gastronómicos entamaos única y desclusivamente con esi finxu…Convertise nun certame gastronómicu de referencia qu`incentivara aquel conceyu como destinu gastronómicu.
Los primeros años aquelles xornaes foren tou un ésitu, no organizacivo, no participativo y no gastronomicu. Alcuerdome perfechamente de la esquisita Merluza a la Cazuela del Restaurante Derby, o de les Patates rellenes d`Angula del Restaurante Las Vegas, ensin escaecer la Marmita Riosellana del Gran Hotel del Sella (pataques con chipirones de potera na so tinta). Col pasu los años a estes xornaes pasaria-yos como a otres munches del so xeneru…Los hosteleros entamarían a cansar y al ver que nun yos sacaben rendimiento dafechu quedarien nel escaezu hasta llegar a desaniciase..
El tema de les Xornaes Gastronómiques vinose a menos. Bien ye ciertu qu`Asturies sigue siendo capital estatal d`esti tipu de folixes, pero perdimos el rumbu. Nadie pue atalantar que entama unes xornaes gastronómiques pa saca-yos un rendimiento direutu. Cuando s`entamen unes xornes d`esta triba tamos semando, nun tamos vendiendo…tamos semando pa más tardi recoyer. Nos, en Tierra Astur cellebramos cerca d`un alcuentru o selmana gastronómica al mes, pero pueo aseguravos que nenguna d`eses xornaes ye rentable por sigo mesma. Agora si, aidamos a facer un trabayu d`espardimientu y recuperación de la nuesa cultura gastronómica perimportante, y aidamos tamien evidentemente a incentivar la venta postrera.
Tengo entendíu que la ñacecia de les Xornaes Gastronómiques de Valdesoto tien un aquel munchu más popular y festivu…La Peña Gastronómica “La Xinta” lleva ya la friolera de 22 años aconceyandose pa fartucar enforma. Hai siete años, cuando s`entamo con esti rifirafe de lo de presentase a Pueblu Exemplar, “La Xinta” convirtió en Xornaes Gastronómiques la so afición y d`ehi surdio esti menú que rescampla a cualisqura que sienta el so argumentu…
Callos
Pitu Caleya
Y Picatostes….
Un menú como esti nun necesita renglones al estilu de l`alta cocina…
“Entrañas de Vacuno y peñuzas de gorrino con su gelatina de manos de vaca, escamas de jamón y pimentón de la Vera”
“Ave de Corral breseada con cebolleta del tiempo y manzanas de la tierra”
“Lengüetas de pan rehogado en zumo de vaca lechera al sarten con su envuelta de caviar de gallina batido al aroma de canela”
Callos
Pitu Caleya
Y Picatostes…Esto si que tien musicalidá.
Tengo que reconocer qu`echo en falta en esti menú un platu, una carne, un xéneru, una parte perimportante de la hestoria gastronómica de Valdesoto y tamién porque nun decilo, d`otros munchos pueblos del centru d`Asturies…
El burrín…
Si sí, el burrín. De xuru que munches vegaes falasteis d`ello pente vosotros. Perse que a lo menos un par d`establecimientos servién, y entá nun se si sirven esta carne d`equinu tierna, a un tiempu que un tantu dulce. Nun voi permitir que naide me critique por asesín, nin por desaniciador de races, pues ye persabió que la única manera de preservar una raza ye moviendo la economía qu`esta mesma xenera al so alrodiu. El burru, o pollín, ye evidentente que como animal de tiru y carga ya nun tien futuru porque tienlo fastidiau pa competir col Pascualín. Como animal de compaña ta bien, pero faeseme que cada vegada son menos los románticos que queden con esi interés, y solu mos queda entós preservar el burru, ya non como raza, sinon como especie animal, incentivando el so consumu como ayalga o rareza gastronómica. Quiciavis nun seya la carne más sabrosa y tierna del mundo, pero ye tamién una de les nueses carnes, que nun tiempu de xuru que mato bien de fames y qu`amás pue sirvir como excelente reclamu, gastronómicu pa Valdesoto.
Pocu más me queda que dicir, a lo menos de lo preparao…Doi por inauguraes estes Xornaes Gastronómiques de Valdesoto, y quiero pidir llarga vida nun solu a elles, sinon a la intensa activida social y cultural que d`esti pueblu sierense se proyecten facia Asturies y facia`l mundu…
Puxa Valdesoto!!
Últimos comentarios