Honráu m`afayo presentando un añu más, y van tres, una de les películes d`esti ciclu pa cinéfilos enfermizos que llega a la so quinceava edición y nel que siempre hai sitiu pa la mio especilidá. La especialidá gastronómica de Peor Imposible; les conocies nel mundu “gafapásticu” como “cannibal movies”, “pelis de caníbales” de tola vida onde s`amiesten sangre, carne, sexu y carnaza a partes iguales.
Acostumbro a presentar nesti ciclu pelis males permales, que faen siempre honor al entitulu del mismu: “Peor… Imposible”. Pero hete equí qu`esti añu paez ser que nun ye asina, porque recurriendo a la documentación esistente nes accesibles redes sociales sobre esti xéneru atópome con que Comidos Vivos, (Mangiati Vivi na so versión orixinal n`italianu) ye tou un clásicu de les Cannibal movies, antecesora de Canibal Ferox , obra maestra del canibalismu xabaz, y tamién obra del mismu director; Umberto Lenzi, (nun confundir con Umberto Tozzi, esti compón e interpreta canciones ñoñes que nos inciten a otru tipu de canibalismu que se practica ensin baxar de la cama)
Comenos en vida unos a otros, depredanos… A mi casi que ya nun me suena a cosa estraña, nin a tribus de Papua / Nueva Guinea. Ciertu qu`equí somos munchu más civilizaos y depredámosnos, comémosnos en vida ensin tan siquier facemos sangre.
Y los abullíos de dolor, los asparabanes y glayios llastimeros dexámoslos pa en casa, pa cuando nadie nun mos vea por requexu dalgún, llegando inclusu a l`automutilación y l`autodepredación. Ye más, llegando inclusu a comer en vida a los nuesos más cercanos allegaos que tienen que sufrir les consecuencies en cadena, ya no de les lletaníes d`un llider d`una secta como`l que apaez na película que de siguíu vais a ver, sinon les consecuencies de vivir alrodiaos d`un tropel de llíderes monstruosos con pelleya de corderu, que mos engañifen colos sos cancios de serena, demientres enllenen los sos cofres del oru que s`escuende na nuesa tierra y prevoquen que mos comamos en vida los unos a los otros.
Llideres, los más, qu`aparenten pexes ensin sangre pero que en rialidá son sanixueles, especialistes en nutrise de la sangre de nueso y la de los nuesos.
Por eso ye importante que de magar güei arrenunciemos al canibalismu capitalista. Nun será fácil abandonar el gustu pol sabor agrín y dulce de los nuesos conxéneres, pero teniemos qu`inténtalo. Cuantos más seyamos los qu`escaezamos el canibalismu como fórmula de progresu más papeletes tendremos de que los que queden presos d`esta secta infame se devoren entre sí.
Mientres tantu demos rienda suelta al canibalismu al que mos conviden los cancios ñoños d`Umberto Tozzi, el que se práctica casi siempre ensin sangre, pero nel que tamién abunden fluxos y ñiascos y col que nun tenemos nin que baxamos de la cama.
Pero además comamos tamién a besos a restu de los nuestros conxeneres. A los neños, a les güeles. A los chigreros, a les camareres… Devoremos cola mirada a esti mundu como si nun quedara mañana.
(Intervención de Lluis Nel Estrada nel Ciclu Cinematográficu «XV Peor Imposible»)
Últimos comentarios