(Readaptación lésica y ortográfica d’un cuentu erótico-gastronómicu de Lluis Nel Estrada espublizáu na Revista del Bollu de la Sociedá la Peruyal nel añu 2003)
«Pensamientos» por Aureliano Alfonzo Ramos
Arrecendía a cielu. L`entrar naquella cocina de Llara yera entrar nel mesmu limbo. Arrecendía a carambelu.
Entá m`alcuerdo perbién d`aquelles picatostes feches con pan bien gordo, recién frites, y de la capa d`almibre al puntu que pingaba de cauna d`elles. Aquel eróticu almibre de mazanes ranetes que yos apurría un tocar y un llambión bramente picardiosu.
Lo de Llara yera un auténticu pecáu. Tol día metía naquel cuartu luxuriosu que yera la so cocina. Trabayando insaciablemente, col finxu únicu de satisfacer a los mozos del pueblu,y tamien a dalguna que otra moza. Toos arranaben por comer de les delicies de Llara… y ella sabíalo.
Les ostres, abiertes al vapor de fueyes de menta y barnizaes con una reducción de llicores de la tierra de la que solu ella sabía la composición. Aquellos pastelinos d`hoxaldre enllenos de delicies de pescáu fresco, fresquísimu como`l so pelleyu, como la so boca. Un hoxaldre amasáu demientres hores, con aquelles manines fines, suxerentes, inocentemente enfariñaes pero que suxerien los más llascivos ya inimaxinables xuegos eróticos. Aquella crema de gambes qu`enllenaba d`evocadores arumes la casa, l`estragal, la cai. Que refervía a borbollones, caliente, mui caliente y picante na so xusta midía, y que facía les delicies de tol que perellí s`averaba… Y ellá esfrutabalo enforma.
Alcuérdome perbien de la cabera vegada que tuve con ella. Fora un día cualisquier. Allevantárame cola necesida de dir a ver a Llara y esfrutar de los sos manxares. Ella recibióme con una sorrisa naquellos tersos llabios, como siempres. Arrecendía a especies, a frutes, y sabía a sal y azúcre. Fízome pasar a la pequeña salitina que fae a un tiempo de comedor… Darréu, la riestra de bocaos que pasaron por aquella mesa fizose infinable. Probe de too. Entamó ufiertandome unes finísimes raxes de carne de xata, en crudu, bañáu nun chorrín d`aceite d`olives arbequines. Aromáticu y frescu como les sos guedeyes prietes y acompangáu d`estremaos tipos de pimientes recién estruñies y picantines como los sos güeyos. Dempues ufiertóme unos cachinos de corderu asau de recién, cola corteya bien rustidina, como`l so pelleyu morenu, finu y sedosu. Aquel corderu yera braera mantega, tienru como`l so petecible cuerpín. Pa detrás un pastel de freses del tiempo cimbraba nel mio platu, asemeyandose a los sos tetinos suxerentes que s`escondíen tres d`aquel blancu ya impolutu delantal. Acompangaba al pastel una base de crema de lleche y unes forgaxes de chocolate prietu espardíes per tol platu, y también la so mirada dende la siella d`enfrente. Llara, insaciable, esperaba que finara los mios platos pa dispidime con un patagüeyu compliz y asina poder arrecibir al siguiente de los mortales que taba esperando pa prebar el so pecaminosu trabayu.
Asina yera Llarina. Una auténtica ninfómana de la gastronomía. Un día torne a dir pela so casa pero ya nun taba ellí. Dicen que coló perlloñe, a ultramar. A deprender nueves técniques de cocina coles que poder satisfacer nun futuru a los sos comensales. Coles que poder satisfacese a ella mesma.
Últimos comentarios