Con Pablo Casanueva nel estrenu de «Bernabé»

O polo menos el so mitu. Asina quedó atestigüáu el pasáu sábado 29 de xunu, nel Llar del Pensionista de Ribeseya. La presentación de la película «Bernabé», dirixía por Pablo Casanueva y protagonizada por Fernando Martínez cunto cola asistencia de más de 250 persones teniendo que quedar a espenses d`una segunda proyeición cerca d`otru tantu.

El qu`esto soscribe foi convidáu a facer una introducción sobre la persona de Pablo Casanueva, y de pasu sobre la película. Esti foi el resultáu:

Bones tardes a toes y a toos:                 

En primer llugar como non nun me queda otra que agradecer enforma a Pablo Casanueva el fechu de que camentara na mio persona como introductor de la so figura nesta presentación de Bernabé. Un llargometraxe guionizáu y dirixíu pol propiu Pablo Casanueva, al que prácticamente tolos equi presentes conoceis, y de xuru que inclusu munchu meyor que yó, porque la mio relación con Pablín, aunque fondera pol cariñu que-y profeso entamó hai prácticamente un añu. O a lo sumu dos.

Y digo dos porque foi agora hai bien pocu más de dos años, cuando nel mio trabayu recibí un mensaxe de un tal Pablo Casanueva, escritu nun perfechu asturianu, nel que mi decía lliteralmente que quería presentase al concursu de semeyes sobre temática asturiana Huella Astur, qu`añalmente organizamos na empresa, y al que concurren cerca de 200 fotógrafos,profesionales y aficionaos, tolos años.  Y claru, la so condición de menor d`edá, naquel entos cuntaba con quince años, pero a un tiempo la so sinceridá y caballerosidá, dignes de tou un paisano, llevábenlu a consultame si podría presentar la obra al nome del so pá.

Asina lo fexo, y Miguel Casanueva vio`l so nome na esposición de les obres finalistes del Huella Astur 2011, porque “Matanza n`Alea”, que nada tien que ver con la “Matanza de Texas” foi escoyía como una de les venticinco meyores semeyes d`aquel concursu.

Pasaría prácticamente un añu pa que tornara a tener rellación con Pablo Casanueva. Les nueves tecnoloxies, y los bonos amigos faenmos siguir de cerca a la xente que se mos revela como “interesante” y pa min Pablin ya yera una d`eses persones. L`estrenu de “Tempus”, el cortometraxe, nun pudo pasame inalvertíu. Confiésome cinéfilu de mediu pelu, pero sosprendiome enforma el gustu de Pablo Casanueva a la hora de guetar les llocalizaciones, a la hora d`escoyer los planos, la lluz, la esencia que transmite cola so cámara. Nuna pallabra Tempus sosprendiome hasta`l puntu de permitirme la osadía de mostrar el curtiu a Nacho Carballo, recién nomáu por aquel entós Director del Festival Internacional de Cine de Xixón. Nacho, namas ver nel «YouTube» unes escenes del curtiu y saber el orixen del mesmu. un “neñu” autodidacta de dieciséis años, nun dudo en asegurame la proyección nel Festival d`esi añu.

Guardeme la confirmación de la proyección como un secretu y fexi a Pablin siguir tolos calces afayaizos como fadría cualquier candidatu a exhibidor. Unvíu de dos copies al Festival, redacción d`una sinopsis, unvíu de dellos fotogrames. Nel programa oficial del FICX de 2012 ehí taba “Tempus”, dientro de la sección dedicada a los autores asturianos. Sé qu`a elli presto-y como me presto enforma a min, si bien, por motivos llaborales, yo nun pudi acompangalu nesi momentu.

Cuando Pablo me llama agora pa presentar Bernabé, fae que me sienta bien halagáu, nun voi decir correspondíu porque Pablo nun tien porque correspóndeme por nada. Recuerdame a cuando yo presente el mio primer llibru de cocina “Con tastu a Sidra” y xuntu a min, na mesa quixi tener a David Manuel Rivas Infante, un profesor d`estructura económica de la Universidá Autonoma de Madrid, asturianu y amante de la sidra col que nun solu trabaría de magar entós una estrecha amistá sinon tamien compartiría delles andances polítiques y culturales. A David yo, que daquella tenía 21 años, tampocu casi que lu conocía de nada pero sabía que lu quería tener al mio lláu aquel día porque en cierta manera David pa min constituyía un referente. Yo nun se si pa Pablin lo soi, un referente, pero por si acasu voi a permitir al mio “ego” que disfrute creyendo que ye asina.

Faeseme difícil falar de cine como vos decía, pero nun se me fae difícil falar de Bernabé, porque Bernabé ,tamién compartió munches sobremeses en mio casa, por boca de mi pa y de los mios güelos maternos principalmente.

 Nel añu 1984 Gomez Fouz espubliza “Bernabé, el mito de un bandolero”. Llibru co`l que un servidor nin tan siquiera ta d`alcuerdu co`l título, porque a min “bandolero” suéname a otra cosa que tengo claru que Bernabé nun yera y a otres cultures que nada tienen que ver cola nuestra.

Bandoleros son muchos de los que mos arrodien, de traxe y corbata y bandoleru yera Curro Jimenez. Pero non, Bernabé nun yera un bandoleru. Ciertu que tampoco  yera un «maqui», pero si yera un “de los del monte”. Yera “un fugáu”.

El citáu llibru, por embargu, foi un revulsivu pa la figura de Bernabé porque sirvió pa revitalizar la so presencia na tradición oral, y pa evitar que`l so mitu desapaeciera. Porque fexo que la hestoria de Bernabé siguiera viva ya no solu nes aldegues y caserios de la comarca oriental, sinon tamién nes villes y ciudades onde quiciavis ya taba aboquiando.

En mio casa el llibru de Bernábe, guardábase como algo sagráu. Emprestose un exemplar qu`enxamás torno y mio  pá tasco y mayó fasta que se fexo con otru años dempués. Compartía estantería colos llibros de la guerra civil, asina como con otros que nunca pescancié, dende los mios güeyos de neñu, que facien allí, como la biografía del dictador o la de los monarcas españoles estrenaos de recién.

Agora Pablin Casanueva, mete-y un esmenón a la nuesa hestoria y reellabora el mitu de Bernabé colos so güeyos, los gueyos d`un rapaz de diecisite años que tien l`enfotu y la valía afayaices pa recopilar tola información necesaria y ellaborar el so primer llargometraxe dedicandolu a “Nabé”, como lu llama la so familia y como a él y presta llamalu. Un “Nabé” que como nun podía ser d`otra forma fala na so llingua, esa llingua que n`ocasiones, como el “fugáu de Turanzas, tien un aquel de mitu, porque aunque munchos la veamos como dalgo propiu, de futuru y de provechu, otros munchos enfótense en dicir que nunca esistió.

Cerca d`un cientu de persones andechen con Pablo, y con Iván, con Miguel y con Chabela, que conformen el nucleu familiar de producción d`esti proyectu.

Nos tiempos del “crowfunding”, Pablin prefier dir pidiendo collaboraciones en forma de sestaferia, tantu como pa consiguir un elencu de casi cincuenta “artistes” a coste 0,  rotobatiar una finca a tractor en tiempo recor o algamar “cameos” na so “opera prima” d`otros artistes asturianos que tendréis que dir descubriendo a lo llargu de la proyección.

Siéntome orgullosu cuando me toca falar perhi de Pablo. Porque Pablo ye el nidiu exemplu de que munchos nun tabamos equivocaos cuando hai agora venticinco años entamábamos a trabayar pola recuperación cultural y llingüistica d`esti conceyu y d`esti pequeñu país.

Fernando, el nuestru “Nabé” d`angüañu, confesó al propiu Pablín cuando ya taba`l trabayu bien allantráu que nel como protagonista tenía bien pocu enfotu, pero que en Pablo entá tenía menos porque`l proyectu paeciá-y enforma abegosu pa la so persona. Siempres que me toca aconseyar a los nuevos valores que se mi atraviesen pel mundiu. Seya nel mio campu gastronómicu, seya nel ámbetu cultural o reivindicativu de cualisquier triba el mio conseyu ye siempres el mesmu… Respeta-y y deprende-y mui munchu de los vuesos dinosaurios, de los vuesos mayores. La precocidá de Pablo Casanueva ta avalada por una garantía d`esitu. Pablo nun solu respeta y deprende de los sus mayores, sinon que s`arrodía y nutre d`ellos y como eso nun lo hai.

Como siempres nesti tipu d`actos echamos en falta a xente mui prósima que mos prestaría que tuvieran compartiendo esti momento con nos, pero tamién Pablin sabemos qu`esa xente taría orguyosisima equí y agora mesmu y eso tien que ser, por desgracia suficiente, pa siguir alantre y nun dar un pasu atrás nin pa garrar puxu.

Ribeseya tien la suerte de contar con Pablo Casanueva, porque Pablo ye d`esa xente excepcional que pueden llegar a facer que la excepción se tresforme en regla, porque Casanueva ya ye profeta na so tierra y Ribeseya merez muncha más xente bona, sensible y talentosa como elli.

Bernabé y Pablo Casanueva, Pablo Casanueva y Bernabé. Cuando fales con Pablín sobre “Nabé” tresmitete tal cariñu al falar de la so figura y tal familiaridá, que por momentos cuento qu`esti castrón llegara a tar entrevistando al mitu.

Munchisimes gracies Pablo. Munchisimes gracies familia. Munchisimes gracies Ribeseya.